Nagpadayag og pasalamat ang Chairman sa BAYAN Central Visayas kang Cebu Archbishop Alberto Uy sa pagpangulo sa Sugboanong Pakigbisog Kontra Korapsyon (SuPaKK), usa ka martsa sa kalinaw nga nanawagan alang sa aksyon batok sa korapsyon ug pagkaguba sa kalikupan.
Kini ang gipaambit ni Jaime Paglinawan, ang Chairman sa BAYAN Central Visayas atol sa pakighinabi sa Bombo Newsteam nga napadangat na ang tingog sa mga Sugboanon uban sa katawhan sa lukop nasud aron sa pagkondenar sa nagbaha nga kurapsyon sa Pilipinas.
Subay kini sa sunod-sunod nga mga programa nga gipahinungod sa pagpalambo sa transparency, accountability, ug good governance, nga magtigom sa mga interfaith ug civic leaders aron moapil sa ilang mga tingog sa usa ka giambitan nga panawagan alang sa pagbag-o.
Human usab sa wala’y pagduha-duha ang Arsobispo sa iyang pagsaway sa mga nalambigit sa korapsyon atol sa martsa sa SuPaKK, ingon man nga iya pa gani nga giawhag nga maghinulsol, atubangon ang kamatuoran, moangkon sa responsibilidad ug iuli ang dili ilaha.
Nipasalig usab si Paglinawan nga dili mohunong sa panawagan hangtud nga mapriso gayud ang tawo nga maoy sad-an hilabi na nga mga dagkong ngalan na ang nabutyag ug nalambigit apan dili mga ilado pa ang ilang napaslak sa prisohan.
Kini bisan paman sa ilang pangutana nga maapil pabakaha ang mga dagkong personalidad sa mahatagan og saktong silot.
