Nakatala na og 81 ka kaso sa leptospirosis ang Probinsya sa Bohol samtang adunay lima ang natala nga namatay ning tuig 2025.
Busa, giawhag sa gobyerno sa Bohol ang mga lumulupyo niini, nga naladlad sa tubig baha, nga mangayo dayon og medikal nga tabang aron malikayan ang impeksyon sa leptospirosis.
Ang datos nga gihiusa gikan sa Enero 1 hangtod Nobyembre 22, 2025 nagpakita sa dakong pagsaka sa gidaghanon sa mga impeksyon sa probinsya.
Samtang, ang Bohol Provincial Health Office (PHO) nakatala og 142.4 porsyento nga pagsaka sa gidaghanon sa mga kaso nga gitaho karong tuiga kon itandi sa 33 ka kaso ug usa ang namatay nga gitaho sa 2024.
Matud ni Dr. Fruserma Mary Uy, ang pangu sa PHO nga ang pagsaka sa kaso gumikan sa mga nasinati nga pagbaha sa daghang mga lugar nunot sa ulan nga dala sa bagyong Verbena.
Ingon man nga walay angay ikabalaka ang mga Boholano kay ang sakit “mapugngan” ug “matambalan” kon hatagan dayon og medikal nga atensyon.
Subay niini, gipakusog pa sa PHO ang mga kampanya sa impormasyon ug edukasyon sa mga apektadong komunidad ug nag-apod-apod og usa ka kahon sa doxycycline sa mga indibidwal nga gisusi nga nameligro human sa pagkaladlad sa baha.
