Nagpatuman ang Cebu City Police Office (CCPO) og hugot ug kompleto nga spot inspection sa tanang mobility assets sa kapulisan gabii, Disyembre 1, 2025.
Gipangulohan mismo ang inspeksyon ni PCOL. George V. Ylanan, Officer-in-Charge sa CCPO, kauban si Atty. PLTCOL. Jomar A. Medil, hepe sa Mobile Patrol Unit (MPU).
Lakip sa gihimong kalihukan ang klaro nga pag-verify sa tanang gi-issue nga sakyanan gikan sa mga organic hangtod sa mga loaned vehicles nga gigamit sa buhatan, diin tumong sa inspeksyon ang pagsiguro nga ang tanang unit anaa sa hapsay nga kondisyon, sakto ang pag-atiman, ug episyente ang paggamit.
Gipahugtan usab niini ang responsibilidad sa matag personahe sa sakto nga paggamit ug pagmintinar sa mga patrol car ug ubang marked units.
Gipunting ni PCOL Ylanan nga ang regular nga pag-assess sa kahimtang sa mga sakyanan maoy yawe aron mapadayon ang paspas ug epektibong police response.
Gumikan matud niini nga ang maayong kondisyon sa mobility assets naghatag og kusog ug kapasidad sa kapulisan aron maka-deliver dayon ug hapsay nga serbisyo publiko.
Busa, nagpabilin ang komitment sa CCPO sa pagpalig-on sa ilang operational readiness ug giasoy ang padayon nilang dedikasyon sa public safety pinaagi sa lig-on nga logistical ug mobility capabilities. via Bombo Koky Cabatingan
