CEBU CITY- Gipaambit ni Police Col. George Ylanan, Officer-In-Charge sa Cebu City Police Office (CCPO), ang ilang mga lakang sa seguridad alang sa umaabot nga Holiday Season ug selebrasyon sa Sinulog 2026.
Sa pakighinabi sa Bombo Newsteam, gisaysay ni Col. Ylanan nga padayon na ang katapusang koordinasyon sa uban pang ahensya aron masiguro ang komprehensibo, magkahiusa, ug maayo nga koordinado nga plano sa seguridad para sa duha ka dagkong kalihokan.
Gilatid usab niya ang mga plano, programa, ug inisyatibo nga iyang ipatuman isip bag-ong OIC sa CCPO. Iyang gipasiugda nga tanang direktiba ug buluhaton sa Cebu City Police Office nahisubay sa 7-Point Agenda sa PNP ubos sa liderato ni Acting Chief PNP PLTGEN Jose Melencio C. Nartatez Jr., ingon man sa Peace and Order Operational Formula ni PRO7 Regional Director PBGEN Redrico A. Maranan.
Dugang pa, nga ubos sa iyang liderato mohatag kini og prayoridad sa pagpalig-on sa paningkamot sa pagpugong ug pagsulbad sa krimen, pagpalambo sa police visibility sa tibuok siyudad, pagpakusog sa proactive nga operasyon aron mapugngan ang kriminal nga kalihokan,pagpalalom sa pakiglambigit sa komunidad aron mapadayon ang kalinaw, seguridad, ug pagsalig sa publiko
Gidugang niya nga ang CCPO nagpabilin lig-on sa iyang pasalig sa pagpanalipod sa publiko ug sa paghatag og luwas nga palibot alang sa tanang residente ug mga bisita, labi na samtang nagkadool ang siyudad sa usa sa pinakabusyong panahon sa tuig.
