Aduna nay bag-ong natudlong University President ang tunghaan nga Cebu Technological University (CTU) human ang karaang presidente niini kay gipataktak subay sa mando sa Office of the Ombudsman.
Ang bag-ong University President kay si Dr. Pet Roey L. Pascual, kinsa kanhi Vice-President for Research and Development sa susamang unibersidad.
Pormal nga nadestino si Pascual human kini naghupot sa pwesto isip Officer-in-Charge sa Office of the University President pipila ka semana ang milabay subay sa Secretary’s Certificate Resolution No. 124, Series of 2025 nga giisyu sa Board of Regents.
Ang appointment kay naaprobahan atol sa Fourth Quarter Regular Meeting niadtong Disyembre 11, 2025. Maghupot sa pwesto si Pascual hangtod sa sunod nga Board of Regents meeting.
Kahinumduman nga nataktak sa pwesto ang kanhi University President nga si Joseph Cutab Pepito human gihukman sa Ombudsman nga liable kini sa Grave Misconduct ug Dishonesty sa akusasyong illegal ang pagpuli niini sa pwesto sa pag-misrepresent niini sa usa ka training ug pag-impluwensya sa imbestigasyon batok kaniya.
Naghupot sa pwesto si Pepito isip CTU University President sukad niadtong tuig 2023.
