Pormal nga giila ug gihatagan og cash incentives sa Cebu Normal University (CNU) ang 44 ka mga topnotchers niini sa 2025 Licensure Examination for Teachers (LET) atol sa usa ka seremonyas sa pag-ila nga gihimo sa kampus.
Sa 44 ka mga topnotcher, 15 niini ang mi-top sa Elementary Level ug laing 29 sa Secondary Level.
Atol sa seremonyas sa paghatag og pasidungog niadtong Martes, Disyembre 23, si CNU President Dr. Daniel Ariaso, Sr. mipasigarbo sa maong kalampusan.
Gihimug-atan usab niini taas nga performance sa tunghaan nga adunay 97 porsyento ang nakapasar sa secondary level ug naangkon ang numero uno nga puwesto sa nasud alang sa secondary level.
Samtang ang CNU niranggo sa ika-4 nga pwesto sa tibuok nasud para sa elementary level nga adunay passing rate nga 93.53 porsyento ug nakakuha sa unang pwesto para sa secondary level nga adunay impresibong 97.57 porsyento nga passing rate, sumala sa Professional Regulation Commission (PRC).
Makadawat og cash incentives ang tanang topnotcher, Ang unang pwesto makadawat og P100,000; ang ikaduha ug ikatulo nga pwesto makadawat og P70,000; ang ikaupat ug ikalima nga pwesto makadawat og P50,000; ug ang ika-6 hangtod ika-10 nga pwesto makadawat og P30,000.
Gipasiugda usab ni Ariaso ang kamahinungdanon sa kalampusan sa mga topnotchers ug mipahinumdom sa mga estudyante nga ang kalampusan labaw pa sa personal nga garbo.
