Malampusong nakabalik sa Yuta ang mga astronaut sa International Space Station (ISS) Crew-11 human sa sayo nga pagtapos sa ilang misyon, sa dihang ang SpaceX Dragon Endeavour capsule nahulog sa Kadagatang Pasipiko duol sa baybayon sa San Diego niadtong Enero 15.
Gipahigayon ang parachute-assisted splashdown alas 3:41 sa buntag human ang kapsula mibulag gikan sa Harmony module sa ISS alas 5:20 sa hapon niadtong Enero 14.
Giila ang mga NASA astronauts nga sila si Zena Cardman (commander) ug Mike Fincke (piloto), uban sa mga espesyalista sa misyon nga sila si Kimiya Yui sa Japan Aerospace Exploration Agency (JAXA) ug Oleg Platonov, usa ka Russian cosmonaut.
Ang sayo nga pagbalik sa Crew-11 tungod sa wala gibutyag nga medikal nga isyu nga naglambigit sa usa sa mga tripulante.
Gipahibalo sa NASA niadtong Enero 8 nga ang misyon matapos og sayo, apan wala nganli ang astronaut nga naapektuhan.
Human sa pag-splashdown, ang mga tripulante gipailalom sa inisyal nga medikal nga mga pagsusi sakay sa recovery vessel. Gilauman nga dad-on sila sa baybayon sa dili pa molupad paingon sa Johnson Space Center sa Houston.
Gilusad ang Crew-11 milupad paingon sa ISS niadtong Agosto 1, 2025, ug miabot sa orbital laboratory paglabay sa usa ka adlaw alang sa orihinal nga giplano nga unom ka bulan nga misyon.
