LAPU-LAPU CITY, CEBU- Gipahigayon sa Lapu-Lapu City Police Office (LCPO) ang mandatory drug test sa ilang mga personahe sa LCPO Headquarters sa Barangay Pusok, Lapu-Lapu City, gahapon Enero 19, 2026.
Gipangulohan kini ni Police Colonel Antonietto Y. Cañete, Officer-in-Charge sa LCPO, isip kabahin sa padayong Internal Cleansing Program sa Philippine National Police (PNP) nga nagtinguha sa pagpalig-on sa disiplina, integridad, ug propesyonalismo sulod sa organisasyon.
Sumala sa LCPO, ang maong kalihokan nagpakita sa lig-on nga pasalig sa PNP nga masiguro nga drug-free ang tanang kapulisan, aron hapsay ug matinud-anon nilang matuman ang ilang katungdanan sa katawhan.
Dugang pa, giila kini isip proaktibong lakang aron mapadayon ang pagsalig sa publiko ug mapreserbar ang labing taas nga sumbanan sa etikal nga pamatasan sa pwersa sa kapulisan.
Gipasiugda usab sa LCPO nga ang inisyatibo nagpakita sa dedikasyon sa liderato sa pagpalambo sa kultura sa accountability ug serbisyo, nga nagpalig-on sa mga kinauyokan nga mithi sa PNP, nga mao ang Serbisyo, Dungog, ug Hustisya.
