Gihabwa sa mga sanitation workers ang mokabat sa 1,000 ka toneladang basura gikan sa kadalanan sa Dakbayan sa Sugbo human sa malampusong Sinulog Grand Parade niadtong Dominggo, Enero 18, 2026.
Nagsugod ang cleanup operations pipila lang ka oras human natapos ang selebrasyon aron daling mabalik ang kalimpyo sa siyudad.
Matod ni Cebu City Mayor Nestor Archival, ang pagdagsa sa gibanabanang 5.2 ka milyon ka tawo ang nag-unang rason sa pagsaka sa gidaghanon sa basura, diin gikan sa naandan nga 500 hangtod 600 ka tonelada nga basura matag adlaw, nitaas kini ngadto sa 1,000 ka tonelada tungod sa kadako sa pundok sa katawhan.
Sayo pa lang sa Lunes, Enero 19, hingpit na nga nalimpyohan ang mga nag-unang dalan ug rota sa parada sama sa P. Del Rosario St., Osmeña Blvd.,General Maxilom Ave., ug Imus Ave.
Kini nga kalampusan gipasidungog sa hiniusang pwersa sa Department of Public Services (DPS), Barangay Enforcement Office, septage teams, ug ang Emergency Environmental Response Team.
Subay niini, aron usab nga mas mapalambo ang waste management sa sunod nga mga katuigan, gipadayag ni Mayor Archival ang pipila ka mga plano, sama sa Cleanup Teams matag Contingent.
Nagplano ang siyudad nga obligahon ang matag pundok nga mosalmot sa Sinulog nga magbaton og kaugalingong team nga maoy manglimpyo sa ilang agi.
Ikaduha mao ang Segregasyon ug Sustainability, diin imbes nga idiretso sa landfill, ang mga plastic bottles gilahi ug gidala sa transfer site., ug ang shredding machine sa dakbayan gibalhin na usab sa Carbon Public Market aron makatabang sa composting, ug adunay Shredder sa matag Barangay.
