Gimandoan ni Cebu City Mayor Nestor Archival ang tanang mga Kapitan sa Barangay sa dakbayan nga estriktong mosunod sa saktong sanitary measures sa paghakot ug pag-transport sa mga basura.
Kini nga direktiba gipagawas sa Mayor human makadawat og mga report mahitungod sa mga garbage truck nga nagtulo ang duga ug wala mataboni og tarong, butang nga makadaot sa panglawas ug kahapsay sa publiko.
Sa maong mando, gihugtan sa Mayor nga kinahanglan fully covered, leak-proof, ug well-maintained ang tanang mga sakyanan sa basura aron malikayan ang baho ug pag-agas sa hugaw sa karsada.
Gipasiugda ni Archival nga kini nga lakang mahitungod sa proteksyon sa kinaiyahan ug pagpatuman sa disiplina sa syudad, busa gikinahanglan ang seryosong kooperasyon sa matag barangay.
