Miugdaw sa tulo ka panimalay ang sunog nga mitumaw sa Sitio Lower Torre, Barangay Inayawan ning dakbayan sa Sugbo niadtong Dominggo sa kadlawn, Pebrero 1, 2026.
Base sa report nga nahipos nga ang sunog nakaapektar sa upat kapamilyahan nga adunay 15 ka mga indibidwal diin duha ka panimalay nga nasunog kay gitalang “totally burned.”
Isip tubag sa maong insidente, ang kagamhanang dakbayan sa Sugbo pinaagi sa Department of Social Welfare Services (DSWS) kay daling mipahigayon og interview ug beripikasyon sa mga Internally Displaced Persons (IDP) aron sa pagdalit og hinabang nga gikinahanglan sa mga naapektuhan.
Ang mga biktima kay kasamtangan gipahimutang sa Inayawan Day Care Center sa mga modular tents nga gitukod sa DSWS isip designated evacuation center.
Padayong nagmonitor ang kagamhanang dakbayan sa sitwasyon ingon man sa pagpasiguro sa publiko sa paghatag og tabang sa mga pamilyang apektado sa katalagman.
