Padayon karong nakakuha og atensyon ang Mount Oten sa Kibungan, Benguet gikan sa mga hikers ug adventure seekers isip usa ka posibleng destinasyon sa umaabot nga Valentine’s Day, tungod sa padayong pagpalambo sa lokal nga mga opisyal sa bukid tungod sa matahum nga talan-awon ug bugnaw nga klima niini.
Ang naasoy nga bukid mao ang pinakataas nga bukid sa Kibungan, nga duna’y gitas-on nga kapin 1,980-metros ibabaw sa lebel sa dagat kondiin ang tumoy sa bukid naghanyag og malinawon ug halapad nga talan-awon sa Cordillera mountain range.
Ingon man ang agianan paingon sa tumoy naglangkob og pi-ot nga mga dalan ug mga pangpang sa kilid, nga mahimong lisod ilabi na sa mga hikers nga mahadlok sa kahabogon. Apan, bisan pa niini, matod sa mga nakasaka na, pag-abot sa tumoy, usa ka makatagbaw ug rewarding nga kasinatian ang imong dili makalimtan.
Kabahin ang Mount Oten sa gitawag nga Kibungan Circuit, usa ka grupo sa mga trail sa bukid nga nailhan tungod sa ilang talan-awong daw sama sa Switzerland.
Nasayran usab nga ang ngalan sa bukid gikuha gikan sa mga oten trees o tree-of-heaven nga kasagarang motubo sa maong lugar.
Sumala sa lokal nga mga opisyal sa turismo, ang lugar angay alang sa hiking, camping, ug backpacking.
Gitambagan nila ang mga bisita nga makig-coordinate sa Kibungan local government ug tourism office aron masiguro ang hustong giya ug kaluwasan.
