Gipasabot ni Engr. Alfredo Quiblat Jr., ang Chief PAGASA Visayas Regional Services Division nga ang rason nganung nakasinati og pag-uwan karon ang ubay-ubay nga parte ang kabisay-an sugod pa gahapong adlawa, Enero9, kay naggumikan kini sa sa shearline nga nakaapekto sa tibuok Visayas.
Gitino ni Quiblat nga ang shearline mao ang panagtagbo sa bugnaw ug init nga hangin, diin ang init nga hangin gagikan sa easterlies o sa Pacific Ocean.
Atol sa ekslusibong pakighinabi sa Bombo Radyo Cebu newsteam kaniya, iyang gitataw nga kung magtagbo ang dili parehong temperatura, adunay motumaw gayud nga madag-umon nga kalangitan, ug magdala kinig mga pag-ulan.
Hinungdan nga sukad pa kagabii, nakasinati ang ubay-ubay nga parte sa kabisay-an og light to moderate rain, occasional heavy rain, busa nga ganinang buntag karong adlawa, ni-isyu na og yellow-orange rainfall warning, ug namintinar kini hangtud alas 8:00 sa buntag ang orange rainfall warning ang kadaghanang parte sa Cebu.
Ingun man nga gipasabot pag-ayo ni Quiblat kabahin niining mga pag-isyu sa mga color warning, diin iyang gitataw nga kung ang PAGASA mo-isyu na og heavy rainfall warning aduna kini tulo ka lebel.
Una niana mao ang yellow rainfall warning nga nagpasabot nga aduna nay 7.5-15 mm of rainfalls nga nasukod. Sunod niini mao ang orange rainfall warning nga nagpasabot nga aduna nay 15-30 mm of rainfalls nga nasukod ug masinati sulod sa 3 ka oras, ingun man nagpasabot nga posible na ang pagbaha, samtang ang red rainfall warning nagpasabot na nga aduna nay lapad nga pagbaha ang masinati kay sobra na sa 30 mm of rainfalls ang nasukod.
