Gikumpirmar sa state media sa United Arab Emirates (UAE) nga usa ka tawo ang namatay sa Abu Dhabi human mibalos ang Iran pinaagi sa pag-atake sa missile sa tanang Naval base sa US sa Gulf Arab states.
Ingon man nga wala na mohatag og dugang detalye ang UAE bahin sa usa ka tawo nga namatay.
Ang mga awtoridad sa Kuwait, Qatar, UAE ug Jordan, nga pulos adunay presensya sa militar sa US, miingon nga ilang na-intercept ang mga missile sa dili pa kini makahatag og dugang kadaot.
Sa usa ka pahayag, giangkon usab sa Islamic Revolutionary Guard Corps (IRGC) ang responsibilidad sa pag-atake, ug gidugang nga naigo niini ang tanang giokupar nga mga teritoryo sa mga base militar sa US sa rehiyon.
Samtang, gikumpirmar sa Bahrain nga gibombahan usab kini sa grupo ug naigo ang usa ka service center sa US Fifth Fleet. Ang mga video nga naglibot nagpakita og baga nga aso duol sa baybayon samtang nagtingog ang mga sirens sa lugar.
Nag-isyu usab ang Abu Dhabi og emergency alert alang sa mga residente nga moadto sa pinakaduol nga luwas nga building ug magpalayo sa mga bintana tungod sa hulga sa missile.
Sa Doha, ang militar sa Qatar miingon nga ilang na-intercept ang mga missile sa wala pa kini makaabot sa teritoryo human sa hiniusang koordinasyon.
Nagpagawas usab ang Embahada sa Estados Unidos sa Doha og pasidaan nga magpabilin sa sulod sa balay, ang ubang mga residente nagpadayon sa paghimo sa naandan nga mga kalihokan.
