Gihangop karon sa publiko ug sa nagkadaiyang hut-ong ang panawagan nga pakanaugun sa pwesto si Quezon City 4th District Representative Bong Suntay human kini miluwat og kontrobersyal ug “sexist” nga pamahayag batok sa aktres nga si Anne Curtis. Sa pakighinabi sa Bombo Radyo Cebu kang Danilo Arao, usa ka PUP Professor ug Kontra Daya Convenor, iyang gihimug-atan nga angay lamang ang singgit sa katawhan nga mokanaog si Suntay gumikan sa dakong kauwaw nga gidala niini sa House of Representatives ug sa tibuok nasud. Matod ni Arao, ang pamahayag ni Suntay nga “manginit ang iyang imahinasyon” tungod sa kaanyag sa aktres maoy usa ka klarong timailhan sa kakuwang sa gender sensitivity, ilabi na nga gisaulog karon ang Women’s Month.
Ang maong “misogynist remarks” ni Suntay natigayon dungan sa iyang pagdepensa sa mga giingong hulga ni Bise Presidente Sara Duterte batok kang Presidente Ferdinand Marcos Jr., diin iyang gipasabot nga “biro” o kumedya lamang ang tanan atol sa usa ka pagdungog niadtong Martes.
Alang kang Arao, makapasubo nga imbes focus sa seryoso nga isyu, gigamit pa ni Suntay ang maong klase sa mga pulong nga layo ra sa gihisgutang impeachment complaint. Tungod niini, ligdong ang baruganan ni Arao nga dili takus si Suntay sa iyang posisyon isip magbabalaod human gipakaubos ang dignidad sa mga kababayen-an pinaagi sa iyang mga komento.
Samtang, taliwala sa maong kontrobersiya, nagpadayon ang deliberasyon sa House Committee on Justice kabahin sa upat ka impeachment complaints batok sa Bise Presidente. Mipahibalo ang tsirman sa komite nga si Rep. Gerville Luistro nga mobotar na ang komite karong adlawa alang sa “sufficiency in substance” sa ikaupat nga reklamo human kini ma-endorso nila ni Rep. Benny Abante ug Rep. Paolo Ortega. Pasabot ni Arao, sa upat ka orihinal nga reklamo, ang ikatulo ug ikaupat na lamang ang giatiman karon human ang uban nakasugat og legal nga kwestyon o gi-withdraw pabor sa mas lig-on nga basehan.
Kon madeklarar nga “sufficient in substance” ang mga reklamo, hatagan og notice ang kampo ni VP Duterte ug adunay napulo ka adlaw aron mosumiter og tubag. Kini sundan sa tulo ka adlaw nga pagtinubagay sa matag kampo ug ang pagsumiter sa mga ebidensya. Gipasalig ni Luistro nga ipahigayon ang pormal nga hearing human sa Semana Santa, posible sa ikaduhang semana sa Abril, samtang padayon nga gi-obserbahan sa publiko ang dagan sa hustisya ug ang pamatasan sa mga magbabalaod nga nalambigit niini.
