Gipahimangnoan sa Bureau of Fire Protection – Central Visayas (BFP-7) ang publiko sa kahibalo kabahin sa paglikay sa insidente sa sunog diin sa unang semana palang sa Marso isip Fire Prevention month kay sagunson na ang natalang sunog sa rehiyon.
Kini ang gipamahayag sa BFP-7 pinaagi ni Supply and Property Accountable Service Chief Fire Supt. Heidi Lynn Virtudes atol sa pakighinabi niini sa mga tigbalita sa Sugbo.
Sumala pa nga usa sa mga balda sa ilang operasyon karon sa pagresponde og alarma sa sunog kay ang dagan sa trapiko diin dili mupadaplin ang mga sakyanan nga makapalangan sa ilang pag-abot sa lugar sa insidente.
Samtang gihimug-atan sab sa opisyal ang importansya sa pagdaginot sa paggamit sa tubig tungod kay ang ilahang pamundo sa mga fire trucks ug water tankers kay susama ra og linya sa residential water pipes nga makaapektar sa ilang operasyon kung hinay ang pressure o walay suplay sa tubig ang espisipikong dapit.
Dugang pa nga panawagan sa opisyal nga kung makamatyag og guba nga linya sa tubig kay dali kining itawag sa hingtungdan water company aron mayo og mapugngan ang pagkausik sa tubig.
Pinaagi sa pagadaginot sa tubig, ang matag panimalay kay makatampo og dakong mapundo gikan sa mga water concessionaires reservoir.
