Gipahugtan sa kapulisan sa Probinsya sa Sugbo ang pagmonitor ug seguridad sa mga gasolinahan, bangko, grocery stores ug uban pang vital installations sa probinsya sa Cebu isip pagpangandam sa posibleng epekto sa krisis sa suplay sa petrolyo.
Kini ang gibutyag ni Police Col. Abubakar Mangelen, Provincial Director sa Cebu Police Provincial Office sa pakighinabi niini sa Bombo Radyo Cebu News Team.
Matud pa sa opisyal nga nakadawat na sila og direktiba gikan sa ilang regional director nga makig-coordinate sa Department of Energy sa rehiyon aron ma-account ang tanang gasoline stations ug uban pang commercial establishments sa probinsya.
Kabahin na sa adlaw-adlaw nga operasyon sa kapulisan ang paghatag og patrol coverage sa mga vital installations, financial institutions ug mga pangunahing dalan aron mapugngan ang bisan unsang krimen nga mahimong motumaw tungod sa sitwasyon.
Dugang pa ni Mangelen, gawas sa mobile patrol units, adunay usab mga fixed patrol elements ug police outposts nga gipahimutang sa nagkalain-laing lugar aron mapalig-on ang police visibility.
Gipahimangnoan usab sa opisyal ang pipila ka negosyante nga dili pahimuslan ang sitwasyon pinaagi sa pag-abuso sa suplay o pagpataas sa presyo sa petrolyo.
Matud pa sa opisyal nga andam ang kapulisan sa pagdakop kon adunay mapamatud-ang paglapas sa balaod, samtang ang mga reklamo sa publiko mahimong ipaabot sa mga police station aron masuta pinaagi sa pormal nga imbestigasyon.
