Mipasalig ang Grains Retailers’ Confederation of the Philippines, Inc. (GRECON) nga adunay igong suplay sa bugas sa nasud, apan ang presyo sa lokal ug imported nga bugas gilauman nga motaas og P1.50 ngadto sa P2 kada kilo, kini gumkan sa nagkataas nga gastohan sa logistik human sa padayon nga pagsaka sa presyo sa mga produktong petrolyo.
Sa pinakabag-o nga monitoring sa Department of Agriculture karong Marso 2026, ang regular milled rice anaa sa P44–P46/kilo, ang well-milled rice anaa sa P47–P49/kilo, ug ang premium rice anaa sa P52–P55/kilo.
Sumala sa report, sa pipila ka mga lugar, ang presyo sa bugas sa Metro Manila misaka og halos P2 kada kilo human ang unang hugna sa pagsaka sa presyo sa gasolina miabot og halos P20 kada litro.
Gipasabot sa GRECON nga bisan dili problema ang suplay, ang taas nga presyo sa lana nagdugang sa gasto sa pagdala sa bugas gikan sa mga probinsya ngadto sa merkado.
Dugang pa niini, ang krisis sa lana sa kalibutan ug ang bag-ong sistema sa taripa sa pag-import sa bugas nakaapekto usab sa presyo sa gi-import nga bugas.
Para sa mga konsumidor, ang dugang nga P2 matag kilo mokabat sa P100–P200 nga dugang nga gasto kada bulan para sa usa ka pamilya nga mokonsumo og 50–100 ka kilo nga bugas.
Kini aduna usab dakong epekto sa mga karenderya ug gagmay nga mga negosyo nga nagsalig sa barato nga bugas para sa ilang operasyon.
Samtang, gipasalig sa Department of Agriculture nga ang pagmonitor sa presyo nagpadayon ug nagtuon sa posibleng mga subsidyo para sa transportasyon ug logistik aron maibanan ang epekto sa taas nga presyo sa petrolyo.
