CEBU CITY- Nanawagan ang grupo sa mga mag-uuma nga dili una mag-import og bugas ang gobyerno sa Pilipinas karong harvest session aron maprotektahan ang lokal nga produksyon ug masiguro ang hustong kita sa mga mag-uuma.
Sa pakighinabi sa Bombo Radyo Cebu, si Leonardo Montemayor, kanhi kalihim sa agrikultura ug chairman sa Federation of Free Farmers, mipahayag nga sa pagkakaron igo pa ang suplay sa bugas sa nasud tungod sa nagpadayon nga anihan sa nagkalain-laing rehiyon.
Apan, gipasidan-an niya nga posibleng mosaka ang presyo sa bugas sa umaabot nga mga bulan tungod sa nagkataas nga gasto sa produksyon, ilabi na sa pagsaka sa presyo sa krudo, diesel ug gasolina nga gigamit sa uma.
Dugang pa niya, bisan pa sa giingong stable nga suplay ug presyo sa bugas, mahimo gihapon kini maapektuhan sa global nga mga panghitabo sama sa tensyon sa Middle East nga nakaapekto sa presyo sa lana.
Gibutyag usab ni Montemayor nga adunay posibilidad nga mas gipaboran sa pipila ka ahensya ang imported rice kaysa lokal nga ani, nga mahimong makadaot sa sektor sa agrikultura.
Busa, nanawagan ang mga mag-uuma og dugang nga subsidiya ug mas lig-on nga suporta gikan sa gobyerno pinaagi sa mga ahensya sama sa Food Terminal Incorporated ug Planters Products Incorporated aron mapalig-on ang lokal nga produksyon ug mapugngan ang posibleng pagsaka sa presyo sa bugas sa merkado.
