Pormal na nga gideklarar ni Presidente Ferdinand R. Marcos Jr. ang state of national energy emergency aron mapanalipdan ang nasud gikan sa nagsingabot nga mga epekto sa nagkagrabe nga tensyon ug panagbangi sa Middle East.
Basi sa kinatibuk-ang Executive Order (E.O.) No. 110 nga gi-isyu gahapong adlawa, Marso 24, 2026, kini nga lakang nagtumong sa pagtubag dayon sa hulga sa kalig-on ug igong suplay sa enerhiya sa nasud human matumbok sa Department of Energy (DOE) ang kritikal nga sitwasyon.
Ingon man nga tungod ang Pilipinas usa ka net importer sa mga produkto sa petrolyo, giila sa gobyerno nga ang nasud dali nga maapektuhan sa kalit nga pagtaas sa presyo sa lana ug mga pagkabalda sa mga supply chains.
Aron maibanan ang epekto niini sa publiko ug sa ekonomiya, gimando usab sa Presidente ang kaylap nga pagpatuman sa Unified Package for Livelihoods, Industry, Food, and Transport o UPLIFT.
Kini magsilbi nga opisyal nga balangkas sa tubag sa tibuok gobyerno aron masiguro ang padayon nga pag-agos sa negosyo ug paghatud sa mga hinungdanon nga serbisyo, labi na sa mga sektor nga grabeng maapektuhan.
Basi sa katapusang panid sa giingon nga E.O. nga gipirmahan ni Acting Executive Secretary Ralph G. Recto, ang deklarasyon magpabilin nga epektibo sulod sa usa ka tuig gikan sa pag-isyu niini, gawas kung bawion o palawigon sa Chief Executive.
