Gipasalig sa Office of the Ombudsman nga andam sila nga mopagawas dayon og kopya sa SALN o Statement of Assets, Liabilities and Net Worth ni Bise Presidente Sara Duterte.
Sumala ni Assistant Ombudsman Mico Clavano, ilang sigurohon nga kini mahatag sa Kongreso subay sa subpoena nga gi-isyu sa House of Representatives Committee on Justice.
Tungod sa nagpadayon nga impeachment hearings batok sa ikaduhang presidente, ang komite miuyon nga mosumite og kopya sa iyang SALN sa opisina.
Basi sa boto sa House Justice Panel, gusto niini nga mandoan ang Office of the Ombudsman nga ihatag ang kopya alang sa mga panahon nga 2007-2013, 2016-2022 ug 2022-2024.
Mga tuig diin siya mayor sa Davao City ug karon nagserbisyo isip bise presidente.
Busa, giseguro sa Ombudsman nga ilang tumanon ang ilang responsibilidad sa pagsunod sa balaod.
Gipasalig usab ni Assistant Ombudsman Clavano nga dili lang kopya sa SALN ang andam na isumite apan lakip na ang kopya gikan sa panahon nga mayor pa ang bise presidente.
Miingon siya nga ilang i-endorso ang hangyo o ‘subpoena’ sa kongreso ngadto sa angay nga opisina nga nagdumala sa maong dokumento; ilabi na ang Mindanao Office of the Ombudsman.
Gipaambit usab sa maong opisyal nga ilang gimonitor ang mga panghitabo bisan atol sa impeachment hearing ni Bise Presidente Sara Duterte sa Kongreso.
Miingon sila nga importante ang pagmonitor tungod kay kini usa sa mga butang nga gikonsiderar sa Ombudsman bahin sa mga reklamo nga gisang-at batok sa ikaduhang presidente.
