Gisikop sa kapulisan ang usa ka content creator sa Brazil human migawas sa imbestigasyon nga imbento ra diay niya ang iyang kaugalingong kidnapping uban sa tabang sa pipila ka armadong lalaki.
Mahinumduman niadtong Abril 21, 2025, gipaambit ni Monniky Fraga sa iyang mga followers ang daw makahadlok nga kasinatian nila sa iyang bana nga si Lucas.
Sumala pa niini nga giatangan sila sa tulo ka armadong lalaki duol sa ilang balay, gidala sa lasang, ug gihulga nga patyon kung dili mobayad og ransom.
Ingon man nga gipagawas sila human nakahatag og kwarta ang ilang mga pamilya.
Human sa insidente, midiretso sa kapulisan ang grabeng nabun-og nga si Lucas aron magreklamo.
Apan sa lawom nga imbestigasyon sa Special Operations Group (GOE), nabutyag ang kamatuoran.
Nadiskobrehan sa phone records nga adunay padayon nga komunikasyon si Monniky sa usa sa mga “kidnapper” sa wala pa ug pagkahuman sa krimen.
Sumala sa kapulisan, kunsabo ra diay ang influencer ug mga suspek.
Ang tinuod nga biktima sa insidente mao ra ang iyang bana nga si Lucas, nga walay kahibalo sa plano, mituo nga tinuod nga anaa sila sa peligro, ug nabun-og pa.
Human sa hapit usa ka tuig, gidakop si Monniky tungod sa mga kasong extortion, procedural fraud, ug pagsumite og bakak nga police report.
Anaa na usab sa kustodiya ang usa sa iyang mga kauban, namatay na ang usa, samtang gipangita pa ang ikatulo.
