CEBU CITY- Gikalipay ni Cebu City Mayor Nestor Archival ang gipatuman sa Philippine National Police (PNP) nga “Safer Cities Initiative” sa tinguha nga minusan ang mga kalihukang nibugoy sa dakbayan.
Kini ang gikabutyag ni Mayor Archival atol sa pakighinabi niini sa mga sakop sa tigbalita gahapong adlawa, Lunes, Abril 13, diin sumala pa sa opisyal, gikalipay niya ang inisyatiba sa kapulisan ilabi nga dili naman kini bag-o nga pamalakad sa balaudnon sa syudad tinguha sa Safer Cities Initiative.
Asoy pa sa mayor, ang mga pagpitol sa mga dili disiplinadong kalihukan sa mga pampublikong lugar kay dakong tabang sa pagpatuman sa kahapsay sa syudad, susama nalang sa smoking in public spaces, traffic ordinances, ug roaming without clothing diin ang dakbayan kay adunay balaudnon niini apan dili striktong napatuman.
Dugang pa niini, giklaro usab nga dili anti-poor ang Safer Cities Initiative, apan pagpatuman lang og disiplina sa katawhan nga anaa sa pampublikong lugar, hinungdan nga nag-awhag ang mayor nga kung sugyot sa mga Sugboanon ang mas luwas ug mas limpyo nga komunidad, gikinahanglan sab ang katawhan nga muabag sa gobyerno.
Gani suhestiyon pa niini kabahin sa mga tawo nga maghukas-hukas sa pampublikong dapit kay ang mga kapulisan kay magdala og extra nga sienna, aron ipasul-ob sa mga badlungon nga makalapas sa inisyatiba sa awtoridad.
Panglantaw sab ni Mayor Archival nga kung aduna may insidente sa pangpangabuso sa inisyatiba ilabi sa habig sa enforcement team kay ilaha kining bantayan pinaagi sa kanunay nga komunikasyon ug koordinasyon sa mga uniformed personnel nga dili bayolente ug bugal-bugalon ang pagbadlong sa mga nakalapas nga aduna gihapon pagtahod isip isig katawo.
Samtang sa habig sa Cebu City Police Office (CCPO) kay gisapublikar niini ang datos sa ilang malampusong pagpatuman sa Safer Cities Initiative pinaagi sa Oplan Bulabog, Oplan Bakal Sita, ug Oplan Pakigsandurot.
Sumala pa sa CCPO nga sulod lamang sa lima ka adlaw kun gikan Abril 9 hangtod karong Abril 13 kay nakatala na sila og 381 ka malampusong operasyon nga miresulta sa 3,901 nga recorded dispositions ug nakolektang multa sa P978,500.
Ang datos sa mga violations nga natala sa mga operasyon kay mao ang musunod:
623 Drinking in public places
649 Smoking in public places
944 Roaming shirtless
962 Curfew violations involving minors
24 Karaoke operations beyond allowed hours
1 Vandalism
123 Illegal structures or road obstructions
498 City Traffic Ordinance violations
65 Other local ordinance violations
Sa kinatibuk-ang ihap sa violators, adunay 856 ang namultahan samtang lain 3,045 ang na-isyuhan og warnings og nakagawas dayon sa ilang kustodiya.
Ang malampusong implementasyon sa Safer Cities Initiative naghulagway sa istratehikonh tinguha sa CCPO sa precision, operational excellence, ug dedikasyon nga mamentinar ang peace and order sa Queen City of the South.
