Pormal nga giaprobahan sa Bangko Sentral ng Pilipinas (BSP) ang paghatag hangtod sa unom ka bulan nga grace period nga walay silot alang sa mga Pilipino nga grabeng naapektuhan sa kasamtangang krisis sa enerhiya.
Baso sa Monetary Board Resolution 296 nga gipetsahan og Abril 8, 2026, ang mga pagbayad sa utang sa agrikultura mahimo usab nga i-defer hangtod sa usa ka tuig, depende sa pagrepaso ug pag-aprubar sa bangko.
Gawas pa niining hinabang, ang mga apektadong utang temporaryo usab nga dili iapil sa mga kategorya sa past-due ug non-performing loan sulod sa usa ka tuig, subay sa mga giya sa pagtaho.
Bisan pa niini nga sugyot, gipahinumdoman sa BSP ang mga bangko ug mga institusyong pinansyal nga mag-amping ug sigurohon nga ang tabang ihatag lamang sa mga kwalipikado.
Kini nga hinabang sa regulasyon mao ang tubag sa ahensya human gideklara ni Presidente Ferdinand Bongbong Marcos Jr. ang state of national energy emergency sa miaging bulan.
Kabahin sa lakang sa presidente mao ang pagpatuman sa programa sa UPLIFT aron suportahan ang mga importanteng sektor sama sa transportasyon, agrikultura, ug MSMEs.
Ang krisis gipahinabo sa kalit nga paglihok sa presyo sa lana sa pangkalibutanong merkado tungod sa nagpadayon nga tensyon sa Middle East.
Sa Pilipinas, bisan pa man og adunay rollback sa presyo sa lana niadtong Abril 14, dili gihapon kini igo aron mabawi ang epekto sa 13 ka sunod-sunod nga semana nga pagtaas sa gasolina, ug 15 ka semana sa diesel ug kerosene.
