Nitambong si Cebu Governor Pamela Baricuatro sa pag-abli sa 3-day expo, nga nagtumong sa pagpalig-on sa food system sa probinsya.
Ang Knowledge & Learning, Innovation, and Trade Expo (KITE 2.0), usa ka mahinungdanong institutional market forum, trade expo, ug learning exchange, diin opisyal nga giablihan niadtong Abril 15, nga nagtimaan sa usa ka dakong lakang sa pagpalig-on sa mga cooperative-driven nga sistema sa pagkaon sa nasod.
Gi-organisar kini sa Philippine Family Farmers Agriculture, Fishery and Forestry Cooperative Federation, inabagan sa Cooperative Development Authority (CDA), Department of Agriculture (DA), CLIMBS Life and General Insurance Cooperative, MASS-SPECC Cooperative Development Center, NATCCO Network, Philippine Chamber of Cooperatives, Inc. (Coop Chamber), ug ang Asian Farmers’ Association (AFA).
Ang tulo ka adlaw nga expo sugod Abril 15 hangtod 17 nagtigom sa mga importanteng stakeholder sa sektor sa agrikultura ug kooperatiba, diin adunay kinatibuk-ang 47 ka kooperatiba ug 74 ka partisipante ang gipakita sa maong expo, ug gipasundayag ang nagkalain-laing sustansyado, climate-smart, ug lokal nga mga produkto nga nagpakita sa kalig-on ug kabag-ohan sulod sa kalihukan sa kooperatiba sa nasod.
Nahiuyon sa food security advocacy ni Governor Pamela Baricuatro, gipakita sa KITE 2.0 kon sa unsang paagi nagsilbi nga lig-on nga haligi ang mga kooperatiba alang sa malungtarong supply chain sa pagkaon nga nagsiguro sa pag-access sa luwas, barato, ug sustansyadong pagkaon alang sa mga Sugbuanon ug mga Pilipino sa tibuok nasod.
Subay niini, eksklusibong nahinabi sa Bombo Radyo Cebu newsteam si Gov. Baricuatro ug iyang gipaambit nga ang maong kalihokan, makahatag og dakong tabang ug tampo sa ekonomiya particular na sa Alergia, Cebu, ug ilabi na usab sa tibuok nasud nga Pilipinas.
