Gipagawas sa Provincial Statistics Office, ug ingun man sa hilippine Statistics Authority (PSA) ang datos kabahin na sa inflation rate, diin niabot na sa 9.1% ang inflation rate sa Cebu Province, samtang sa Dakbayan sa Sugbo 6.8%, sa Lapu-Lapu 8.1%, ug sa syudad sa Mandaue adunay 6.1% inflation rate.
Subay niini, gikab-ot sa Bombo Radyo Cebu newsteam ang habig ni Dennis Derige, ang tigpamaba sa Partido Manggagawa,aron sa pagklaro kung unsa ang mamahimong pamahayag o komento nila sa maong hisgutanan.
Matod ni Derige, gilaoman na daan nga mosaka ang inflation rate sa kasamtangan tungod sa nagpadayong tensyon sa Middle East, nga miresulta sa halapad nga krisis sa nagkalain-laing nasud, lakip na ang Pilipinas.
Busa, gipanglantawan ni Derige nga maayo unta og makonsiderar kini sa Regional Wage Board ug mamahimong sumbanan kung nganung gikinahanglan nga ihatag ang ilahang petisyon nga 100 pesos wage increase.
Gidugang pa niya nga usa usab kini sa sumbanan nga dili kaya kontrolon sa DTI ug uban pang ahensya sa gobyerno ang presyo sa mga nag unang batakang palaliton sa kasamtangan, ug laoman nga adunay gayuy inflationary effect.
Subay sa maong hisgutanan, usa sa giluwat nga datos may kalabotan na sa hisgutanan sa transportasyon ug pagkaon, gani niabot kini sa 12.5% sa March 2026, ug 11.9% sa February 2026.
Diin gitino ni Derige nga importante kini nga klase sa mga numero nga datos, ilabi na nagahisgut na kini kabahin sa transportasyon ug pagkaon, gumikan kay sa matag usa ka mamumuo, adunay 45% nga gikonsumo na alang sa pangkaon, ug ang nahabiling 55% niini padulong sa non-food expenses, diin diri usab nalangkob ang transportation expenses.
Mao nga kung mosaka na ang matag presyo sa mga batakang palaliton, laoman na nga ang 45% nga alang sa pangkunsomo sa pagkaon, mosaka kini.
Hinungdan nga usa usab kini sa basehan sa ilahang petisyon tungod kay basi sa ilahang napanglantawan sa datos sa consumer price index, sukad nga mibuto ang tensyon sa Middle East, ang kanhing 45% nga food expenses sa mga mamumuo, nahimo na kining 60-70% matag adlaw.
Subay niini, gipanawagan ni Derige sa gobyerno, ilabi na nga gasing-abot na ang Labor Day, nga tagaan og prayoridad ang mga lakang, palisiya ug balaod nga maghatag og temporaryong economic ug assistance relief ang katawhan.
