Nagkataas ang tensyon sa pamilya sa namatay nga National Artist ug Superstar nga si Nora Aunor sa unang anibersaryo sa iyang pagkamatay gahapon Huwebes, Abril 16.
Taliwala sa panagtapok sa mga tigpaluyo ug pamilya sa Libingan ng mga Bayani sa Taguig City, mitumaw ang isyu sa giingong panagbangi tali sa iyang mga anak nga sila si Ian de Leon ug Lotlot de Leon.
Sumala sa report, giinsistir ni Ian nga siya ang “bugtong legal nga manununod” sa iyang inahan ug siya ang modumala sa mga legal nga butang sa iyang kabilin, lakip na ang plano alang sa usa ka One Person Corporation (OPC).
Gipasabot sa kampo ni Lotlot de Leon pinaagi sa iyang abogado, si Atty. Mark Julius C. Estur, nga ang iyang kliyente wala’y interes sa bisan unsang panulondon gikan sa kabilin sa ilang inahan.
Sumala nila, wala siya gikonsulta sa nahisgutang mga lakang ug wala usab siya kabahin sa bisan unsang pagpangalap og pundo o pagdumala nga gihimo ni Ian.
Giklaro usab sa kampo ni Lotlot nga wala silay nahibal-an bahin sa bisan unsang Last Will and Testament nga naghatag og kontrol sa iyang igsoon.
Sumala sa pahayag, adunay lahi nga charitable foundation nga gitukod ni Lotlot ug sa iyang mga igsoon, nga kaniadto nahibal-an ug gisuportahan ni Ian, apan sa ulahi gihimakak nga nahibal-an.
Si Nora Aunor namatay niadtong Abril 16, 2025 tungod sa acute respiratory failure ug gilubong isip kabahin sa usa ka state funeral sa Libingan ng mga Bayani isip pag-ila sa iyang kontribusyon sa arte ug kultura sa nasud.
