Gipahibalo ni Presidente Donald Trump sa Estados Unidos nga miuyon ang Iran nga ihunong ang pagpatay sa walo ka babayeng nagprotesta, nga giingong iyang hangyo ug isip pagtahod kaniya isip Presidente sa Estados Unidos.
Sumala ni Trump, upat sa mga babaye ang buhian dayon samtang ang laing upat, prisohon sulod sa usa ka bulan.
Gitawag niya kini nga “Very good news” ug giangkon nga tungod sa iyang hangyo nga gikansela ang giplanong pagpatay.
Bisan pa, gihimakak sa mga awtoridad sa Iran ang pahayag ni Trump.
Sumala sa ahensya sa balita sa hudikatura sa Iran nga Mizan News Agency, walay plano nga patyon ang mga babaye ug ilang giingon nga kini tanan hinimo-himo lang sa Amerika.
Giinsistir sa Iran nga gigamit lang ni Trump ang isyu aron magpasigarbo ug ibalhin ang atensyon gikan sa mga isyu sa gubat ug tensyon sa rehiyon, lakip ang isyu sa Strait of Hormuz.
Sumala sa Iran, daghang mga babaye nga nadakpan ang gibuhian na, samtang ang uban nag-atubang og mga kaso nga mahimong moresulta sa pagkabilanggo apan dili ang silot nga kamatayon.
Sa karon, wala pay opisyal nga pahayag gikan sa White House o Iranian Foreign Ministry bahin sa isyu.
