Gipasiugda ni Presidente Ferdinand R. Marcos Jr. ang kamahinungdanon sa lig-on nga kooperasyon tali sa nasyonal ug lokal nga mga gobyerno aron epektibong makahatag og serbisyo sa mga Pilipino.
Sumala sa Presidente, ang mga programa sa nasudnong gobyerno dili igo kung dili kini suportahan ug panghingusgan sa mga lokal nga opisyal sama sa mga mayor, board of members ug mga kapitan sa barangay.
Giangkon usab sa Presidente nga ang nasudnong gobyerno dili makapatuman sa mga proyekto kung wala ang kooperasyon sa lokal nga gobyerno.
Gihimug-atan usab niini nga ang tinuod nga kalampusan sa mga programa sa gobyerno nagdepende sa kolektibong aksyon ug dedikasyon sa tanang lebel sa gobyerno.
Samtang, gipahibalo usab ni Marcos Jr. nga ang gobyerno nagtumong sa paghupay sa kagutom sa nasud pinaagi sa regular nga pag-apod-apod sa bugas sa matag pamilyang Pilipino.
Sumala sa Presidente, ang iyang damgo mao nga walay Pilipino nga gutumon sukad sa iyang paglingkod sa pwesto. Busa, giseguro usab sa administrasyon ang pagpatuman sa mga programa nga makahatag og igong pagkaon ug suporta sa mga pamilyang Pilipino. Kini nga lakang kabahin sa mas lapad nga kampanya batok sa kakabus ug kagutom taliwala sa mga hagit sa ekonomiya.
