Hugot nga gihimakak sa Filipino-German beauty queen nga si Imelda Schweighart ang mga taho nga nag-ingon nga siya gitangtang sa Miss Universe Philippines (MUPH) 2026 isip kandidato tungod sa giingong mga isyu sa bullying.
Pipila ka bulan sa wala pa kini gitaho, mibalik ang intriga human sa pagpagawas sa iyang introduction video isip usa sa mga representante sa Pilipinas sa Miss Grand International All Stars.
Kini nakakuha og lain-laing mga reaksyon gikan sa mga fans sa pageant diin ang uban misuporta kaniya, apan ang uban nagduhaduha sa iyang kredibilidad.
Sa usa ka komento nga nag-akusar kaniya sa bullying ug pagkatangtang sa MUPH, prangka nga mitubag si Schweighart ug gitawag kini nga “fake news” nga nag-awhag sa mga tawo nga mag-focus sa mas makahuluganon nga mga butang.
Mahinumduman nga niadtong Marso, gipahibalo sa MUPH nga ang usa ka kandidato dili na tugutan nga magpadayon sa kompetisyon, apan wala niya nganli.
Si Schweighart, kinsa unta morepresentar sa Kalibo, Aklan, mipaambit usab og mensahe bahin sa katapusan sa iyang kasinatian sa iyang panaw sa pageant.
Bisan pa sa kontrobersiya, si Schweighart napili nga usa sa mga representante sa nasud sa MGI All Stars, kauban sila si Fuschia Ravena, Gazini Ganados, Alexia Nuñez, ug Keylyn Trajano.
