Gipangita ni Davao City Mayor Sebastian “Baste” Duterte si Cebu Governor Pamela “Pam” Baricuatro atol sa paglusad sa RAGE Coalition (Reform Alliance for Accountability, Good Governance, and Ethics) sa Cebu niadtong Domingo, Mayo 10, 2026.
Ang maong kalihokan gihimo usa ka adlaw sa wala pa ang botohan sa House of Representatives kabahin sa articles of impeachment batok kang Vice President Sara Duterte, diin nagtigom ang mga kaalyado ug tigpaluyo sa pamilyang Duterte aron ipakita ang ilang nagkahiusang alyansa sa Kabisay-an.
Atol sa maong pagtapok, namatikdan sa pipila ka mga partisipante ang pagkawala ni Gov. Baricuatro, nga nailhan nga usa sa mga lokal nga opisyal nga mipadayag og suporta sa pamilyang Duterte atol sa kampanya sa miaging piniliay.
Una nang migawas ang mga hungihong nga giingong adunay impluwensya ang Gobernadora sa pipila ka mga magbabalaod sa Sugbo kabahin sa mga diskusyon sa impeachment complaint batok kang Vice President Duterte. Apan, sa usa ka publikong pahayag, klarong gipanghimakak ni Baricuatro ang maong mga alegasyon.
Matod sa Gobernadora, wala siya miapil o misuporta sa bisan unsang lihok nga nagtumong sa pagtangtang sa Bise Presidente sa pwesto. Gipasiugda usab niya nga ang iyang prayoridad nagpabilin sa pagdumala sa probinsya, kalamboan, ug paghatag og serbisyo publiko sa mga Sugboanon.
Sa pagkakaron, wala pa’y dugang pamahayag gikan sa kampo sa Gobernadora kabahin sa iyang pagkawala sa maong kalihokan.
