Gipaimbestigahan ni Senador Imee Marcos ang giingong paggamit sa Planters Products, Inc. o PPI nga kontrolado sa gobyerno isip nga “palusot” sa dakong importasyon sa bugas, bisan pa sa kasamtangang limitasyon sa direktang importasyon sa bugas sa gobyerno ubos sa Rice Tariffication Law.
Sa usa ka pamahayag, si Marcos miingon nga iyang gisang-at ang Proposed Senate Resolution No. 392 aron imbestigahan ang giingong “kuwestiyonable” nga pagsulod sa minilyon nga sako sa imported nga bugas sa PPI, usa ka kompanya ubos sa pagdumala sa Department of Agriculture (DAR).
Gipangutana sa senador kon giunsa sa PPI pag-import og halos P2 bilyon nga kantidad sa bugas samtang ang gibanabana nga kita niini sa 2024 kay P90 milyon lang.
Basi sa mga report nga gikutlo sa senador, gibanabana nga ang PPI naka-import na og 1.7 milyon nga sako sa bugas gikan sa India, Vietnam, Thailand ug Myanmar sa managlahing kargamento gikan sa 2025 hangtod 2026. Dugang 1.5 milyon nga sako ang gikataho nga gikan sa India, sumala sa Federation of Free Farmers.
Giinsistir ni Marcos nga kinahanglan nga maghimo og imbestigasyon kung ang PPI gigamit ba isip “backdoor” aron tugotan ang gobyerno sa pag-import og bugas, usa ka butang nga giingong gidili sa National Food Authority ubos sa Rice Tariffication Law.
Sa samang higayon, gikuwestiyon usab sa senador ang giingong kakulang sa public bidding sa mga transaksyon, nga mahimong makalapas sa Government Procurement Reform Act.
Sumala ni Marcos, ang mga lokal nga mag-uuma mahimong maapektuhan pa sa padayon nga pagsulod sa imported nga bugas.
Gipasiugda usab sa senador nga ang Department of Agriculture gimandoan sa pagsuporta sa lokal nga produksiyon ug dili magsilbing agianan alang sa mas daghang importasyon sa bugas.
