Gipadayag ni Cebu Provincial Board Member Dr. Stanley Caminero, ang kasamtangang Chairman of the Committee on Energy, nga ang kanihit karon sa suplay sa kuryente nga nasinati sa mga konsumedor, normal ra panahon sa ting-init.
Dugang pa niini nga, basta panahon sa ting-init, motaas ang demand sa mga konsumedor, hinungdan nga tungod sa kadaghan sa naggamit, malimatado usab ang suplay nga maapod-apod.
Atol sa eksklusibong pakighinabi sa Bombo Radyo kang Caminero, siya mibutyag nga sa iyahang panglantaw, dili kaayo dako ang kausaban sa power generation tungod kay ang maapektiran niini kadto mang anaa sa energy-mixed nga power generation nga gagikan pananglit sa hydroelectric.
Ingun man gipasabot niya nga ang hydroelectric dili ingun ana kadako og component sa energy-mixed, kinsa mao ang tinubdan sa power generation, busa dili ingun ana kalapad o kadako ang kausaban.
Subay niini, gikanayon ni Caminero nga sa kasamtangan, tungod sa ka init sa panahon nga nasinati sa kadaghanan, kasagarang naggamit na sa mga nagkadaiyang appliances sama sa air conditioner, hinungdan nga kusog ang demand sa kuryente.
