Gi-isip nga last respect nalang nga adunay closure ang estorya sa kinabuhi ni Vince Dingding, mao kana ang panghinaut ni Barangay Capitol Site Captain Kelly Quijada sa hisgutanan sa pag-claim sa patay nga lawas ni Vince, kinsang lakip sa napatay sa engkwentro tali sa militar sa Cauayan, Negros Occidental.
Sa eksklusibong pakighinabi sa Bombo Radyo Cebu kang kapitan Quijada, gibutyag niini nga anaa na sila ikatulo nga adlaw sa negosasyon sa ginikanan kabahin sa pagkuha sa patay nga lawas ni Vince, apan giingong padayon pa sa pagdumili ug nisukwahi ang amahan.
Apan gilaraw ni Quijada nga posibling nakalitan lang ang amahan ug nadismaya sa kadugay na nga panahon gikan sa paglakaw ni Vince niadtong 2018, ingon man nga padayon pang nakigbisog ang inahan niini sa sakit nga kanser.
Gani, nagtuo siya mismo nga nilarga kining si Vince, tungod kay lapas naman 5 ka tuig kining wala mopatim-aw sa ilahang barangay, ug wala usab nahisgutan sa ginikanan ang maong matang sa problema.
Gihulagway pa niya nga usa ka buotan nga bata si Vince, diin kaniadto ang kinabuhi niini anaa lang sa balay, eskwelahan ug simbahan nga mi-serbisyo usab isip sacristan, hinungdan nga nakalitan kini sa nahitabo.
Samtang, giklaro usab sa kapitan nga wala pay kasiguradohan kung kanus-a kuhaon sa pamilya ang patayng lawas ni Vince Francis Dingding—ilabi na nga sa karon, dili motugot ang amahan niini nga dalhun sa Sugbo ang patayng lawas, gumikan kay buot niini nga kung diin kini namatay, adto ra usab ilubong.
Gipaambit usab niya nga isip konstituwente sa iyahang barangay kining nahisgutang personalidad, wala gikalimod ni Kapitan Quijada nga limitado ang ilahang resources hinungdan nga midangop kini sa buhatan sa Department of Social Welfare and Development Field Office 7 – Central Visayas (DSWD-7), ug misugyot kini nga mas angayan nga magkoordinar ang DSWD sa Sugbo ug Negros.
Sa pagkakaron, wala pa masayod ang kapitan kung kanus-a ma-claim ang patay nga lawas ni Vince, apan kung ugaling adunay kausaban, giingong sigurado kini nga makahatag og assistance ang Cebu City Government pinaagi sa DSWS, ug ang barangay mismo.
Hinuon, iyahang gitino nga wala pa niini ma-istorya si Cebu City Mayor Nestor Archival kabahin sa maong sitwasyon.
Sa habig usab sa pagbayad sa punerarya nga mokabat og P36,500, giingong gi-abaga na kini sa Local Government Unit sa Cauayan, Negros Occidental.
