Giila sa Department of Education (DepEd) ang nagpadayong krisis sa literacy sa nasod human sa usa ka assessment nga nagbutyag nga 87 porsiyento sa mga estudyante sa Grade 11 ang naglisod gihapon sa pagsabot sa ilang gibasa.
Sumala sa DepEd, ang maong numero usa ka klarong indikasyon sa dugay nang mga kakulangan sa pagkat-on sa sistema sa edukasyon sa Pilipinas ug dili lang kini problema sa lebel sa senior high school.
Sa usa ka pamahayag, ni DepEd Undersecretary for Learning Systems Carmela Oracion nga seryosong gitagad sa ahensya ang mga resulta sa pagat-on gikan sa Second Congressional Commission on Education (EDCOM 2).
Gipasabot sa opisyal nga ang problema sa kahanas sa pagbasa natipon sukad pa sa mga unang grado ug nagkagrabe sa paglabay sa panahon tungod sa lainlaing mga hinungdan sama sa kakabos, kakulang sa mga materyales sa pagkat-on, limitado nga suporta sa balay, mga pagkalangan sa klase, ug ang epekto sa pandemya.
Agig tubag, gipatuman sa DepEd ang usa ka summer remediation program alang sa mga estudyante sa senior high school nga gikatakdang matapos karong semanaha.
Nag-andam usab ang ahensya og bag-ong mga literacy assessment sa dili pa ang opisyal nga pagbukas sa mga klase aron mailhan ang mga estudyante nga nanginahanglan og dugang nga suporta ug dinalian nga pagtudlo.
Gidugang sa DepEd nga ang mga remediation ug enrichment nga mga kalihokan ilakip na sa bag-ong three-term school calendar aron mas matubag ang mga kakulangan sa pagkat-on sa tibuok tuig sa pag-eskwela.
Sa pikas bahin, giangkon usab sa kagamhanan nga ang bug-at nga trabaho sa mga magtutudlo nagpabilin nga usa ka dakong hagit sa kasamtangan bisan pa man sa mga reporma nga nasugdan na sa pagpatuman.
