Labing menos 21 ka tawo ang namatay human miulbo ang sunog sa usa ka hotel sa Delhi, India.
Nahimutang ang hotel sa Malviya Nagar sa habagatang Delhi, usa ka lugar nga nailhan nga residential area alang sa mga estudyante ug mga batan-ong propesyonal.
Ang mga awtoridad nag-ingon nga labing menos 40 ka tawo ang naluwas gikan sa maong building.
Adunay usab mga taho sa mga tawo nga miambak gikan sa mas taas nga mga andana aron lang makaikyas.
Matud ni Jitendra Kumar, local official nga ang sunog mahimong nagsugod sa usa ka restaurant sa ground floor sa building, apan wala pa kini gitino gumikan nagpadayon pa ang imbestigasyon.
Nagpayahag na usab sa iyang pahasubo si Indian Prime Minister Narendra Modi sa mga nagbangotan nga pamilya ug nanghinaut nga ang mga nasamdan dali nga maulian.
