Gikalambigit ang anak sa Presidente ug kasamtangang Ilocos Norte Representative nga si Ferdinand Alexander “Sandro” Marcos sa giingong pagdawat og mga maleta nga puno sa kuwarta, atol sa gihisgutan nga imbestigasyon sa Cayetano bloc kalabot sa mga kuwestiyonableng flood control projects sa nasod.
Atol sa pagdungog sa komite niadtong Huwebes, giingon ni Belnard Tube, usa sa mga nagpa-ila nga kanhi sundalo nga personal niyang nakita ang batan-ong magbabalaod sa usa ka balay didto sa Ilocos niadtong tuig 2022. Isip ebidensya, iyang gipakita sa komite ang usa ka litrato diin makita silang duha nga magkauban.
Tungod niini, gipangutana ni Senador Imee Marcos ang saksi kon aduna ba gyuy mga maleta nga dala niadtong higayona ug kon kinsa gayod ang nakadawat niini.
Gawas kang Rep. Marcos, gilakip usab sa mga kanhi sundalo sa ilang pasangil si kanhing Senador Antonio Trillanes IV ug kanhing House Speaker Martin Romualdez.
Sumala sa usa sa mga saksi, giingon nga naghatod siya og usa ka dako nga paper bag nga adunay sulod nga gibanabanang P5 milyon ngadto sa P6 milyon ug gisundan pa kini sa unom ka mga maleta ngadto sa kampo ni Trillanes.
Gihulagway usab sa mga kanhi militar ang ilang giingong paghatod og mga maleta nga puno sa kuwarta ngadto sa mga panimalay nga gipanag-iya o nalambigit kang Romualdez nga nahimutang sa McKinley Hill ug South Forbes Park sa Makati.
Gibutyag sa usa ka saksi nga moabot ngadto sa 52 ka maleta ang iyang gihatod sa balay didto sa McKinley, samtang laing saksi usab ang nideklarar nga naghatod og 26 ka maleta sa South Forbes Park.
