Gilauman nga makigpulong si Presidente Ferdinand Marcos Jr. kang Russian President Vladimir Putin sa ASEAN-Russia Summit sa Kazan, Russia sa Hunyo 17 hangtod 18, sumala ni Russian Foreign Affairs Minister Sergey Lavrov.
Matud ni Lavrov nga si Marcos gilauman nga motambong sa miting isip kabahin sa pagsaulog sa ika-50 nga anibersaryo sa diplomatikong relasyon tali sa Pilipinas ug Russia, bisan wala pa’y opisyal nga kumpirmasyon gikan sa Malacañang.
Lakip sa mga hilisgutan nga hisgutan mao ang pagpalapad sa kooperasyon sa pamatigayon, pamuhunan, enerhiya, agrikultura, syensya ug teknolohiya, edukasyon, turismo, ug uban pang mga natad, subay sa tinguha sa Russia nga mapalig-on ang relasyon niini sa ASEAN sa wala pa ang pagka-chairman sa Pilipinas sa organisasyon ning 2026.
Mahinumduman nga ang gisundan ni Presidente Marcos, ang kanhi Presidente Rodrigo Duterte, nakigkita kang Putin kaduha atol sa iyang termino, nga giingon ni Lavrov nga usa ka importante nga kontribusyon sa pagpalambo sa kooperasyon tali sa Pilipinas ug Russia.
