PROVINCE OF CEBU- Nakapiyansa ang kanhi consultant sa Kapitolyo sa Sugbo nga si Byron Garcia og ₱108,000 human sa iyang pagka-aresto sayo ning semanaha tungod sa mga kasong sexual harassment, samtang iyang gipadayag nga nakasinati siya og “police maltreatment” samtang anaa sa kustodiya sa mga awtoridad.
Sumala sa pahayag nga gipagawas sa iyang opisyal nga Facebook account, giisyu ni Presiding Judge Jennifer Pepito-Maniwang sa Mandaue City Municipal Trial Court (MTC) Branch 1 ang release order alas 11:00 sa buntag niadtong Sabado, Hunyo 13, 2026, nga nagtugot sa iyang temporaryong kagawasan pinaagi sa piyansa.
Si Garcia gidakop niadtong Huwebes, Hunyo 11, base sa warrant nga may kalabotan sa mga reklamo sa sexual harassment nga gisang-at batok kaniya.
Apan, gawas sa mga kaso nga iyang giatubang, mipadayag usab si Garcia nga nakasinati siya og pisikal nga pagmaltrato gikan sa mga otoridad atol sa iyang pagdakop ug pagkabilanggo sa kustodiya.
Matud pa kaniya, mikalit og grabe ang iyang kahimtang sa panglawas niadtong Biyernes sa hapon, hinungdan nga gidala siya sa Talisay District Hospital ug gibalhin sa Vicente Sotto Memorial Medical Center (VSMMC) sa Cebu City alang sa emergency medical treatment ug espesyal nga obserbasyon.
Gibasol ni Garcia ang iyang pagka-ospital sa giingong pagmaltrato nga iyang nasinati gikan sa mga pulis.
Sa pagkakaron, nagpabilin siyang naka-confine sa ospital samtang naghulat sa katapusang assessment sa mga doktor nga nag-atiman kaniya.
Hangtod karon, wala pa makapagawas og opisyal nga pahayag ang kapolisan aron tubagon ang mga alegasyon ni Garcia bahin sa giingong pag-abuso samtang anaa siya sa kustodiya.
