CEBU CITY- Gipasiugda sa Cebu City Disaster Risk Reduction and Management Council ang padayon ug gipakusog nga training alang sa mga responders ug community awareness programs sa tibuok Dakbayan sa Sugbo, ilabi na sa lebel sa mga barangay.
Matud ni Cebu City Councilor Dave Tumulak, chairman sa Committee on Disaster Risk Reduction and Management, regular nga gihimo ang mga pagbansay alang sa mga first responders aron mapalambo ang ilang kahibalo ug ka-andam sa aktuwal nga emerhensya.
Lakip sa mga gihimong kalihukan ang simulation exercises ug hands-on training nga nagatuki sa aktuwal nga sitwasyon sa kalamidad sama sa linog, baha, ug sunog.
Gipunto usab sa konsehal ang importansya sa padayon nga capacity building aron mas mapaspas ug mas organisado ang pagresponde sa panahon sa krisis, ilabi na sa grassroots level.
Dungan niini, gipakusog usab ang community awareness drive diin ang mga impormasyon ug safety protocols gidala diretso sa mga barangay, eskwelahan, ug pribadong sektor pinaagi sa audiovisual presentations ug information campaigns.
Tumong niini nga mas masabtan sa publiko kung unsa ang angay buhaton before, during, ug after sa kalamidad aron malikayan ang kalibog ug maprotektahan ang kinabuhi sa katawhan.
Gipasabot sa lokal nga pamunuan nga magpadayon ang training ug information drive aron mapalig-on pa ang disaster preparedness sa Cebu City.
