Naglunsad ang Metropolitan Cebu Water District o MCWD og upat ka puntos nga aksyon aron masiguro ang padayon nga suplay sa tubig sa Metro Cebu samtang nagpadayon ang epekto sa El Niño.
Sa press conference niadtong Hunyo 17, gipahibalo ni MCWD General Manager Atty. John Dx Lapid nga aktibo nang gimonitor sa ahensya ang kahimtang sa klima ug ang mga tinubdan sa tubig sa rehiyon.
Matud ni Lapid, base sa report sa PAGASA, anaa na karon ang El Niño sa tropical Pacific ug adunay kapin 80 porsyento nga posibilidad nga molungtad kini hangtod sa sayong bahin sa tuig 2027.
Sa pagkakaron, adunay kakulangan nga kapin 16,000 ka metro kubiko nga tubig matag adlaw ang MCWD. Ang kakulangang kini nag-una tungod sa pagkunhod sa produksyon sa Jaclupan Water Facility sa Talisay City, nga naapektuhan sa ubos nga lebel sa tubig sa Mananga River tungod sa kainit ug kakulang sa ulan.
Lakip sa upat ka puntos nga plano sa MCWD mao ang Monitor, Augment, Optimize ug Assist.
Ubos sa “Monitor”, padayon nga gitan-aw sa MCWD ang mga forecast sa PAGASA, kahimtang sa ulan, suba ug groundwater aron matubag dayon ang posibleng kakulang sa tubig.
Sa “Augment”, gipadali sa MCWD ang pag-drill sa 11 ka bag-ong production wells, pagpalapad sa suplay gikan sa bulk water providers ug pag-abli sa ubang alternatibong tinubdan sa tubig.
Gilauman nga makadugang kini og 39,000 ka metro kubiko nga tubig matag adlaw, lakip na ang gikan sa Cordova desalination project ug ubang bag-ong balon sa dakbayan.
Samtang sa “Optimize”, gipakusog sa MCWD ang pag-ayo sa mga tagas sa tubo, pagminus sa non-revenue water, ug rehabilitasyon sa mga balon aron mapahimuslan pag-ayo ang kasamtangang suplay.
Ubos usab sa “Assist”, nagbukas ang MCWD og mga public hydrant sa mga barangay sa Guba ug Agsungot, samtang naghatag usab kini og mahulamang 16-litro nga mga sudlanan sa tubig ug suporta sa water tanker operations sa Cebu City.
Gipasalig sa MCWD nga padayon silang makigtambayayong sa mga barangay ug lokal nga kagamhanan aron matabangan ang mga komunidad nga posibleng maapektuhan sa kakulang sa tubig panahon sa El Niño.
