Giklaro sa Juvenile Justice and Welfare Council (JJWC) nga ang mga menor de edad nga suspek sa makalilisang nga insidente sa usa ka high school compound sa Tacloban City, dili angay buhian.
Gipasabot ni JJWC Executive Director Tricia Clare Oco nga ubos sa Juvenile Justice Law sa nasud, ang mga suspek manubag gihapon bisan kung pareho silang menor de edad.
Kung mapamatud-an nga ang mga suspek ang nakahimo sa krimen pinaagi sa hustong proseso sa pag-ila, mahimo gihapon silang mag-atubang og conditional criminal liability.
Sa pagkakaron, matod niya, ang mga suspek kinahanglan una nga moagi sa angay nga mga programa sa interbensyon o ibutang sa detensyon basi sa mga legal nga pamaagi ug sa nagpadayon nga case developments.
Gipanghimakak usab ni Atty. Oco ang dayag nga opinyon sa publiko nga ang mga suspek mahimo lamang buhian nga walay tulubagon.
Samtang, andam ang Malacañang sa mga sugyot nga usbon ang Juvenile Justice and Welfare Act human sa mga insidente sa kapintasan nga naglambigit sa mga menor de edad.
Apan, gihimug-atan ni Palace Press Officer USec. Claire Castro nga suportahan kini sa President, dependi sa bersyon sa balaodnon ug sa epekto niini sa kaayohan sa mga batan-on.
