Misaka na ngadto sa labing menos 164 ka tawo ang namatay samtang dul-an sa 1,000 ang nasamdan human sa duha ka sunod-sunod ug kusog nga linog nga miigo sa Venezuela.
Ang unang linog nga adunay magnitude 7.2 miigo niadtong Huwebes sa hapon (oras sa Pilipinas), gibanabana nga 160 kilometros ang gilay-on gikan sa Caracas.
Wala pay usa ka minuto ang milabay, laing mas kusog nga linog nga may magnitude 7.5 ang sunod nga miigo, diin kini nakaguba sa daghang mga edipisyo ug imprastraktura sa maong dapit.
Gipahayag ni interim President Delcy Rodriguez nga ang gobyerno nakigtambayayong na sa mga pribadong kompanya aron makakuha og heavy equipment aron mapadali ang search and rescue sa mga biktima.
Ang probinsya sa La Guaira, nga nahimutang duol sa kapital nga Caracas ug diin makita ang pangunang tugpahanan sa nasud, mao ang labing grabeng naapektuhan sa kalamidad.
Grabe usab nga nadaot ang lungsod sa Morón sa Carabobo, nga nahimutang duol sa epicenter sa linog.
Daghang mga balay ang nangatumpag, samtang ang mga residente sa maong dapit kasamtangang nawad-an og suplay sa kuryente ug tubig.
Gikumpirma sa lokal nga gobyerno nga tulo ka mga bata ang lakip sa mga nakabsan sa kinabuhi.
Nagpasidaan ang U.S. Geological Survey nga posibleng mosaka pa ang ihap sa mga namatay samtang nagpadayon pa ang operasyon sa pagpangita sa mga nanga-trap ug nangawala.
Liboan pa ang gibanabana nga naapektuhan sa linog, diin gikumpirma sa nagkadaiyang lider sa oposisyon nga dili momenos sa 10,000 ka mga tawo ang giingong missing o wala pa makit-an hangtod niadtong Huwebes sa buntag.
Sa pikas bahin, nagpadala na ang Estados Unidos og mga search and rescue team, samtang nangandam na usab ang ilang kagamhanan sa dugang nga hinabang alang sa mga apektadong lugar sa Venezuela.
