Padayon ang pagtimbang-timbang sa kadaot sa Office of Civil Defense Region XII (OCD XII) sa mga lugar nga naapektuhan sa kusog nga ulan nga misangpot sa kalit nga pagbaha ug pagdahili sa yuta sa pipila ka bahin sa Rehiyon 12.
Sumala kang OCD XII Information Officer Anne Santos, natala ang pagbaha sa Barangays Landan ug Maligo sa Polomolok, South Cotabato human miawas ang mga suba ug kanal.
Tungod niini, daghang pamilya ang temporaryong gipalikas ug gibutang sa mga evacuation center.
Sa Alamada, Cotabato, mikaylap usab ang usa ka video nga nagpakita sa mga estudyante nga gidala sa usa ka kalabaw aron makatabok sa nag-awas nga suba, nga nagpakita sa grabeng epekto sa baha sa transportasyon ug kaluwasan sa komunidad.
Usa usab ka landslide ang natala sa mga titip nga lugar sa South Cotabato nga nakaapekto sa mga sakyanan ug kabtangan, apan walay report sa namatay o grabe nga samad.
Padayon ang monitoring sa OCD XII sa kondisyon sa panahon ug lebel sa tubig sa mga suba, samtang nag-awhag sila sa publiko nga magpabiling alerto, likayan ang delikadong mga lugar, ug sundon ang mga pahimangno sa lokal nga gobyerno alang sa kaluwasan.
