CEBU CITY- Gipasiugda sa usa ka criminal law expert ug ICC-accredited lawyer nga kinahanglang pasagdan nga moagi sa normal nga legal nga proseso ang mga kaso sa korte ug dili angay nga maimpluwensyahan sa presyur sa publiko.
Kini ang gipahayag ni Atty. Rameses Villagonzalo subay sa tulo ka adlaw nga rally sa Iglesia ni Cristo (INC) isip pagpakita og suporta kang Senador Rodante Marcoleta, kinsa nag-atubang og plunder complaint sa Office of the Ombudsman.
Matod ni Villagonzalo, personal nga responsibilidad ni Marcoleta ang maong kaso ug dili angay nga idikit o isagol sa relihiyon.
Tungod niini, gipahinumdoman niya ang publiko nga kinahanglang tahuron ang rule of law ug due process hangtod nga makapakanaog og pinal nga desisyon ang korte.
Giklaro usab ni Villagonzalo nga ubos sa Batas Pambansa Blg. 880 o ang Public Assembly Act, ang pagpahigayon og rally nagkinahanglan og permit gikan sa lokal nga gobyerno, gawas lamang kon kini himoon sa usa ka deklaraidong Freedom Park.
Gihatagan niya og katin-awan nga ang People Power Monument o EDSA Shrine dili usa ka Freedom Park, hinungdan nga gikinahanglan gihapon niini ang legal nga pagtugot o permit.
Gipasidan-an sa maong eksperto ang mga organizers nga kung walay saktong papales ang tapok-tapok, mahimo silang mag-atubang og administratibo ug kriminal nga tulubagon, ilabi na kon mosangpot kini sa kagubot o paglapas sa balaod.
Bisan pa man giila ug gipanalipdan sa Konstitusyon ang freedom of speech ug right to peaceable assembly, iyang gipahinumdoman ang publiko nga aduna gihapon kini limitasyon aron mapreserba ang public order ug ang katungod sa uban.
Gipahimangnoan ni Villagonzalo ang publiko nga ang pagpasaka og kaso wala nagpasabot nga sad-an na ang usa ka akusado.
Matod niya, magpabilin ang presumption of innocence kon ang pagka-inosente sa usa ka tawo hangtod nga walay pinal nga hukom ang korte.
Nagpahinumdom ang abogado sa publiko nga dili sagulan og relihiyon ang mga kriminal nga kaso, ug tugotan ang ligid sa hustisya nga molihok subay sa balaod ug due process.
