CEBU CITY- Mibutyag si Atty. Rameses Villagonzalo, usa ka Sugboanong abogado, nga ang baruganan sa bag-ong majority group nila ni Sen. Sherwin Gatchalian ug sa pipila ka nilang kaubanan, lakip na ang baruganan sa Integrated Bar of the Philippines (IBP) maylabut sa pag-convene og quorum sa SB12, kinahanglan respetuhon.
Apan, matod niini, kinahanglan usab nga respetuhon sa publiko ang baruganan sa pipila ka mga abogado, sama kaniya, sa ilang pagsupak sa maong mga lakang, tungod kay alang kanila ug base sa ilang legal nga obserbasyon, wala mahiuyon sa balaod ang gibuhat sa majority. Giingon niya nga dili managsama ang kasamtangang sitwasyon ug ang nahitabo sa kasong Avelino vs. Cuenco niadtong 1949.
Dugang ni Villagonzalo nga dili kini applicable sa kasamtangang kaso sa Senado tungod kay walay miyembro sa Senado nga anaa sa gawas sa nasud ug wala usab gideklarang bakante ang bisan usa sa 24 ka mga lingkoranan sa Senado.
Gihimug-atan usab sa abogado nga dili mahimong basehan ang nahitabo sa Senado niadtong 2015 sa dihang si Franklin Drilon pa ang Senate President, tungod kay wala man kini ma-challenge o marepaso sa Korte Suprema.
Matod pa niya, dili pa mahimong isipong adunay duha ka bakanteng lingkoranan sa Senado tungod kay wala pa makumpirma nga anaa sa gawas sa nasud si Ronald dela Rosa. Sa kaso usab ni Jinggoy Estrada, wala pa kini makonbikto pinaagi sa pinal ug executory nga desisyon sa korte.
