Gilauman ni Senate President Sherwin Gatchalian nga ang tanang senador, lakip na ang mga miyembro sa minorya, motambong sa pagsugod sa impeachment trial ni Bise Presidente Sara Duterte karong adlawa, kay matod niya nga kabahin kini sa ilang mga katungdanan isip senator-judges.
Gikanayon ni Gatchalian nga importante alang sa matag senador nga personal nga makadungog sa mga ebidensya ug argumento nga gipresentar sa duha ka habig aron sila hingpit nga makaapil sa pagdungog.
Gidugang usab sa Senate President nga ang mga senador mahimo usab nga mangutana sa mga saksi, ingon man sa mga prosekusyon ug mga panel sa depensa, atol sa husay.
Bisan pa, giinsistir ni Gatchalian nga ang impeachment court dili angay nga mahimong usa ka forum aron hisgutan ang ubang mga isyu, lakip ang mga legal nga butang nga may kalabotan sa iyang pagkapili isip Senate President.
Mahinumduman nga si Senate Minority Leader Alan Peter Cayetano kaniadto miingon nga ang kaangayan sa impeachment trial mahimong mameligro samtang ang Korte Suprema sa Pilipinas wala pa makasulbad sa iyang petisyon nga ibasura ang sesyon sa Senado niadtong Hunyo 3 diin si Gatchalian napili nga Senate President.
Apan alang kang Gatchalian, ang isyu sa liderato sa Senado angay hisgutan sa plenaryo isip kabahin sa mga gimbuhaton sa lehislatura sa balay balauranan ug dili sa impeachment court.
Samtang, ang senador nagtuo nga ang pagtambong ni Senador Loren Legarda ug Robin Padilla sa all-senator caucus niadtong Biyernes usa ka positibo nga timaan, tungod kay kini nagpakita nga daghang mga senador ang andam nga ihiklin ang isyu sa liderato ug mag-focus sa impeachment trial.
Bisan pa niini, iyang gipasiugda ang kamahinungdanon sa pagbaton og quorum aron ang husay magpadayon bisan kung ang tanang 24 ka mga senador dili makatambong sa matag adlaw sa husay.
Gibutyag ni Gatchalian nga daghang mga miyembro sa minorya ang nakigkontak kaniya aron ipasabut nga wala sila makatambong sa caucus tungod sa mga naunang pasalig ug uban pang hinungdanon nga mga obligasyon.
