Nagmalampuson ang unang duha ka adlaw sa impeachment trial ni Vice President Sara Duterte, diin aduna nay mga ebidensya nga napresentar, ug mga depensa gikan usab sa defense team sa bise presidente.
Subay niini, eksklusibong gikuha sa Bombo Radyo Cebu ang linya ni Akbayan Rep. Percival “Percy” Cendaña aron kuhaon ang iyahang habig kabahin sa maong impeachment trial.
Matod ni Cendaña, hingpit nang andam ang prosecution sa maong husay gumikan kay duha usab kini katuig nga gitrabaho hangtud nga niabot sa punto nga hingpit nang nasugdan niadto lang Lunes, Hulyo 6.
Hinungdan nga gikalipay niya kini, ilabi na nga usa usab ang Akbayan partylist ang walay puas nga mi-indurso niini aron hingpit nga mapanubag ang bise presidente sa mga kalihokan niining pagpangawkaw sa nasudnong pundo.
Gikalipay usab niya ang hana-ay nga pagka-presentar sa house prosecutor sa mga ebidensya sa kasong gipasaka batok sa bise presidente, ug matod niya, kini nahitabo tungod kay miagi kini sa taas nga proseso sa Committee on Justice para tun-an ang articles of impeachment para matino ang mga ebidensya.
Samtang, bisan sa kasamtangan, aduna gihapoy mga pamahayag sa kadaghanan nga ang luyo sa mga pagpaningkamot sa impeachment trial sa bise presidente aduna nay tatsa sa kaugalingong interes ug pamolitika.
Kabahin niini, nagkanayon si Cendaña nga sa katapusan klaro nga ang impeachment process usa ka proseso nga gipatubag ang usa ka opisyal nga nakalapas sama sa mga nasudnong lagda.
Dugang pa niya, ang impeachment process usa ka proseso nga nagladlad ug nagpakita kung gi-unsa sa usa ka opisyal sa gobyerno pag-abuso ang “power” niini, pagpangawat sa nasudnong panudlanan.
Diin gihimug-atan niya nga dili kini yanong matawag nga usa ka “pamolitika” lang, kondi usa na ka pamaagi nga patubagon ang angay manubag.
