Nanawagan ang Regional Development Council (RDC)-7 ngadto sa mga nasyonal nga ahensya sa kagamhanan nga paspasan ang pagpagawas sa kapin P6.6 bilyon nga pundo alang sa rehabilitasyon sa mga dapit nga naigo sa katalagman sa lalawigan sa Sugbo.
Kini nga resolusyon usa sa mga nag-unang lakang nga dungan nga giaprubahan sa ikaduhang Quarter Full Council meeting ug sa unang State of the Region Address (SORA) ni Cebu Governor Pamela Baricuatro nga gipahigayon sa Danao City Civic Center.
Nakahatag og dakong duso sa maong resolusyon ang panginahanglan sa dinaliang pagbangon human sa magnitude 6.9 nga linog nga miigo sa amihanang Sugbo niadtong Septyembre 30, 2025, ug sa Bagyong Tino niadtong Nobyembre 4, 2025.
Subay niini, ang Department of Public Works and Highways sa Central Visayas (DPWH-7) nipasaka og 148 ka mga proyekto nga mabalor og P4.5 bilyon ubos sa ilang Quick Response Fund (QRF) aron ayohon ang mga nangagubang dalan, tulay, ug mga tunghaan. Gikan niining kantidada, P856 milyon pa lamang ang nagawas, hinungdan nga gihangyo sa RDC-7 ang DPWH Central Office nga prayoridadon ang pagpagawas sa nahabiling P3.6 bilyon.
Giendorso usab sa konseho ang hangyo ngadto sa Department of National Defense (DND) alang sa pagpagawas sa pundo gikan sa National Disaster Risk Reduction and Management Fund (NDRRMF) para sa Disaster Rehabilitation and Recovery Assistance Program (DRRAP) nga nagkantidad og P2.9 bilyon.
Kini nga programa gidesinyo alang sa 14 ka mga lokal nga kagamhanan (LGUs) nga grabeng naapektuhan sa Bagyong Tino, lakip na ang mga lungsod sa Consolacion, Liloan, Compostela, Balamban, ug Asturias; ang mga dakbayan sa Danao, Cebu, Mandaue, Talisay, ug Toledo; ingon man ang mga isla sa Camotes nga gilangkuban sa Poro, San Francisco, Pilar, ug Tudela.
Gawas niini, nangayo sab ang RDC-7 og dugang P105.6 milyon gikan sa NDRRMF alang sa mga temporaryong puy-anan ug pag-ayo sa mga opisina sa gobyerno nga nangadaot sa linog.
Tungod niining sunod-sunod nga kalamidad, gibutyag ni Jennifer Bretaña, ang Regional Director sa Department of Economy, Planning, and Development sa Central Visayas (DEPDev-7), nga posibleng mosaka ang ihap sa kakabus sa rehiyon sa umaabot nga resulta sa 2025 Family Income and Expenditure Survey (FIES) nga wala pa published.
