Mikunhod pag-ayo ang gidaghanon sa mga barkong moagi sa Strait of Hormuz, sumala sa International Organization for Independent Tanker Owners, tungod sa nagkataas nga tensyon sa rehiyon.
Gikan sa kasagarang 130 ka barko kada adlaw sa wala pa misamot ang panagbangi, naa na lamang kini karon sa single digits.
Misunod kini sa bag-ong pagbayloay og airstrikes sa Estados Unidos ug Iran niadtong Miyerkules ug Huwebes.
Sumala sa militar sa U.S., nakaigo ang ilang mga airstrike sa kapin 90 ka target militar sa Iran, lakip ang mga pasilidad duol sa Strait of Hormuz aron pahuyangon ang kapasidad sa Iran sa pag-atake sa mga barkong pangkomersyo.
Gikumpirma sa Iran nga labing menos 14 ka tawo ang namatay ug 78 ang nasamdan sa maong mga pag-atake.
Samtang, ang Islamic Revolutionary Guard Corps (IRGC) miingon nga naglunsad usab sila og mga pag-atake sa mga base militar sa U.S. sa Kuwait ug Bahrain, ug mipahimangno nga magpadayon pa ang ilang “punitive response.”
Sa laing bahin, giingon ni U.S. President Donald Trump nga gusto sa Iran nga makignegosasyon pag-usab, apan nagduhaduha siya niini.
Gisalikway kini ni Iranian Foreign Minister Abbas Araghchi, nga nag-ingon nga ang Iran motubag sa mga aksyon sa Amerika pinaagi sa konkretong aksyon, dili sa mga pulong.
